சேலையில் தொட்டில் கட்டி
சாலை வேலை பார்க்கும் அம்மாவுக்கும்..!

காக்கி சட்டை போட்டு
ஆட்டோ ஓட்டும் அம்மணிக்கும்..!

பத்து செங்கல்லை தூக்கும் சித்தாளாய்
வேலை பார்க்கும் பெரியாளுக்கும்..!

நாலு வீடு பத்து பாத்திரம் தேய்த்து
நாலு எழுத்து படிக்க அனுப்பும் தாயம்மாவுக்கும்..!

கல் கணவனிடமும் புல் புருஷனிடமும்
குப்பை கொட்டும் குணவதிகளுக்கும்..!

அந்நியனாய் அயல் தேசம் சென்ற புதல்வனிடம்
கண்ணியமான பாசத்திற்காக ஏங்குபவளுக்கும்..!

உயிரை ஒருவனுக்கு கொடுத்து உடம்பை
மற்றவனுக்கு கொடுத்தவளுக்கும்..!

வறுமையில் தன்னை தொலைத்து கரு அறையில்
சிவப்பில் வாழும் 'அவளு'க்கும்..!

குடும்பத்தை பேண பஸ் பயண
கூட்டத்தில் இடிபடுபவளுக்கும்..!

கணநேரம் விலகாமல்
கணினி இயக்கும் கண்மணிக்கும்..!

காதலிப்பவளுக்கும்
காதலித்து கைவிடப்பட்டவளுக்கும்..!

நேரிலும் நிழலிலும்,
விண்ணிலும் மண்ணிலும்,
என்றும் சுகமளிப்பவளுக்கும்..,

என் சிரம் தாழ்ந்த
மனம் கனிந்த
மகளிர் தின வாழ்த்துக்கள்... :)